عمانيات -

كما يقولون: « صيت الجمَل .. قتله «.
وهذا المثل ينطبق عليّ غالبا وتحديدا.
ولهذا مطلوب مني ان ادافع عن المرأة ، كل النساء وكل امرأة سواء كانت ظالمة او مظلومة، حلوة او نُص نُص.
وهنا اقّدّم مَشهدا من المَشاهد والافلام التي تحدث معي دائما بسبب كتابتي اليومية عن الحب والتغزّل بالمرأة.
اول ( رصاصة او صاروخ ) وصلني من زوجتي.. باعتبار أن « الأقربين اولى بالصواريخ «.
باغتتني وانا اجلس لوحدي وقالت : مش انت طول نهارك بتحب ع الفيس بوك.. اختي بدّها عبارات تحطها على لوحة ؟
قلتلها : حاااضر.
عادت زوجتي وقالت إن جارتنا طلبت منها ورجتني اني ادوّر لابنها على « وظيفة «..
وختمت كلامها : مش انت نصير المرأة ؟
قلت : حاااضر.
كنت بالشارع وشفت ستّ بتسوق ومنشغلة بمكياجها. قلتلها يا ست ما بيصير هيك.انت يا دوب مسيطرة ع السيارة.
قالت مش انت الكاتب فلان واللي دايما نصير المرأة ة و.....
أتركني ازبّط مكياجي...
شوي والا هيّ .. داخلة بالحيط.
ولّعت بين جاراتنا بسبب « مصفّ سيارة بالكراج.
وطلبوا اني احل المشكلة.
تحيّرت .. اذا قلت الحق على هاي باخسر هذيك والمفروض اني « نصير المرأة « كل النساء.
تبهدلت وانا باحجز بين جاراتنا.. وفلتت بجلدي.
وفي الانتخابات التي تشارك فيها المرأة ، دائما باسمع من يقول « ما دمت انت نصير المرأة.. اكيد رح تنتخب المرأة .
وطبعا ، بيذكروني بكتاباتي اللي عن الحب...
مش قلتلكم
« صيت الجمَل ..
قتله «
.. اااااخ يا راسي !!!