إذا كانت فيروز تقول « سألوني الناس « ، فانا اقول « جنّنوني الناس «.
كل ما باحكي مع واحد .. بينهي المكالمة بعبارة « حُطّني بالصورة «.
رحت احلق.. شَعري طبعا.دردشت مع الحلاّق وحكى لي قصة حياته من يوم ما ولِد لحد ما أبوه طلّق امّه.
وعندما انتهى من حلاقتي، قال :
شوف كيف الحلاقة الحلوة .. ولمّا تروّح وتغسل شَعرك... اعملي ألوه.. و.. حُطّني بالصّورة !
اتصل معي صديقي حاتم ، ما غيره ، وسألني : شو صار بالموضوع ؟
تفاجأت.. ورديت: اي موضوع يا ابو هديل ؟
قال : مذكراتك اللي بتكتبها ..
قلت : الله.. نسيت.
وحياتك لسه محتار فيها
شو اكتب وشو ما اكتب .. في بلاوي سودا بحياتي الصحفية وخايف أكتبها.
قال حاتم : عموما لما تخلّص .. حُطني ب الصورة !
قلت له : حاضر.
صادفت في كراج العمارة.. جارتنا .
سألتني: شو صار بموضوع انتخاب « مسؤول العمارة « ؟
قلت لها « مش متفقين على شخص.. بنحاول مع الجيران نوصل لحل يُرضى جميع الأطراف.
أغلقت باب سيارتها وقالت « عموما لما يصير معك اشي .. حُطني بالصورة.
تواصلت مع « ابو نسَب « وعرض عليّ شراء قطعة ارض بمنطقة السّلط... وقال « في كم قطعة كويسات وسعرهن طري.. خذلك قطعة وانا بوخذ قطعة جنبك .
قلت « أتركني افكّر.
قال : طيّب .. لما تستقر على رأي.. حُطني بالصورة.
كل واحد..
كل وحدة باحكي معها .. بتنهي حديثها
تنساش تحطني بالصورة ...
شو انا فاتح ستوديو ؟