- يمه
- نعم يا عيني..
عميتي عيوني يا أمي.. اسودت الدنيا أكتر..
قلبي بينزف يمه.. تعالي احكيلك شو صار...

قابلتي ربك متوضية لفجر الجمعة، وربك اختارلك تصليها عنده.....
طلعت روحك بنفسين، يعني الله ما عذبك بسكرات الموت..
هاي القوية: متتي ببيتي وبين إيديي يا حبيبتي..
يمه اصحي..
يمه ردي عليي يا حبيبتي..
طلعت روحك لباريها..
خليني أكملك.. رحتي عالمستشفى،، أسرع اجراءات وأسرع غسول.. غسلتك بإيديي يمه وعملت المي فاترة زي ما بتحبيها مش سخنة ولا باردة، ياالله ما أزكى ريحتك وما انعم بشرتك وجهك كان زي عروس بيوم عرسها مفتح زي الورد.. جدلتلك شعراتك بإيدي.. ولفيت الكفن عليكي برضه بأيدي اه صحيح.. لما كنت اقلبك يمين وشمال كنتي تضميني بقوة... والبنت اللي غسلتك حكتلي انه غسولك ميسر وجسمك مش محتاج تعطير...

حملناكي لبيتك.. اللي انبنى بعرق جبينك انتي وبابا -الله يرحمكم ويجمعني فيكم- ضليتي بالبيت ساعتين واحنا نقرألك قرآن وندعيلك ونوصيكي تجاوبي عسؤال الملكين.. ع فكرة كل اللي بتحبيهم اجو ودعوكي.. وبصراحة حرقتي قلوب الكل..

طلعوكي عالجامع باب الدار.. وطلعت روحي معك يمه صابتني هستيريا انجنيت.. رجعولي امي مشان الله.. غطوها منيح ليلة مبارح كانت بردانة... صلى عليكي عدد كبييييير من الناس... نيالك يمه شو كسبتي شفاعة هالناس..

كان أول يوم بالعزا زي الكابوس.. كسرتي ضهري وهديتي حيلي.. بس اجانا معزيين كتار والبيت ما كان في مجال وكلهم كانوا يذكروا محاسنك ويركزوا على ملاقاتك للضيف..

الحمدلله يمه هي خلص اليوم التاني على خير.. أنا ومروة كويسين ورضينا بقضاء الله واحتسبنا.. لا تخافي يمه مروة بعيوني يا حبيبتي.. أصلا هيي اللي ضلت الي من بعدك..

صمتي عرفة مع انه صحتك كانت تعبانة، وضحيتي لله وكانت اول وآخر أضحية إلك.. وزعتيها بإيدك على اللي بتحبيهم..
ربنا يتقبلها منك

رحتي للي أحسن مني وأرحم عليكي.. والحمدلله حسن خاتمتك هو عزائي....

طولت عليكي صح؟ كملي نومتك ريته نوم العوافي